नवी दिल्ली :
‘अथांग सागर, रम्य किनारे। सह्याद्रीचे उंचकडे॥ गवत फुलांच्या रंगांवरती महाराष्ट्राचा जीव जडे॥…’ या वर्णनासह राज्याच्या जैवविविधतेचे दर्शन घडविणारा महाराष्ट्राचा ‘जैवविविधता मानके’ चित्ररथ २६ जानेवारीला राजपथावरील पथसंचलनाचे आकर्षण ठरला. महाराष्ट्राच्या सेनाधिकाऱ्यांनी विविध मार्चींग कन्टीजंटचे नेतृत्व करून राजपथावर राज्याचा गौरव वाढवला.
राष्ट्रपती रामनाथ कोविंद, पंतप्रधान नरेंद्र मोदी आणि संरक्षण मंत्री राजनाथ सिंह यांच्यासह अन्य मान्यवरांच्या उपस्थितीत राजपथावर प्रजासत्ताक दिन सोहळा पार पडला. पंतप्रधान नरेंद्र मोदी यांनी हुतात्मा वीर सैनिकांच्या स्मरणार्थ इंडिया गेट शेजारील राष्ट्रीय युध्द स्मारक येथे देशवासीयांच्या वतीने आदरांजली वाहिली. त्यानंतर राष्ट्रपती रामनाथ कोविंद यांनी ध्वजारोहण केले. राष्ट्रगीत व त्यासोबतच २१ तोफांची सलामी देण्यात आली. जम्मू-काश्मिर पोलीस दलाचे सहाय्यक पोलीस निरीक्षक बाबू राम यांना अभूतपूर्व शौर्य व बलिदानासाठी सर्वोच्च शौर्य पदक ‘अशोक चक्र’ (मरणोत्तर) जाहीर झाले. या समारंभात बाबू राम यांच्या पत्नी रिना राणी आणि पूत्र माणिक शर्मा यांनी हा सन्मान राष्ट्रपतींच्या हस्ते स्वीकारला.
स्वातंत्र्याच्या अमृतमहोत्सवी वर्षाचे प्रतिबिंब दर्शविणारा विविध फॉर्मेशनमधील ७५ विमानांचा फ्लाईंग पास या पथसंचलनाचे खास वैशिष्ट्य ठरले. यावर्षीच्या पथसंचलनात सेनेचे अश्वदल, सीमा सुरक्षा दलाचे उंटदल, रणगाडे, आकाश क्षेपणास्त्र, युध्द टँक, लष्कर, नौदल आणि वायुदलाचे पथ संचलन आणि बँड पथकांची आकर्षक पेशकश उपस्थितांचे आकर्षण ठरले. राजपथावर देशाच्या समृध्द सांस्कृतिक वारसा व शस्त्रसज्जते सोबतच महाराष्ट्राच्या ‘जैवविविधता मानके’ विषयावरील चित्ररथांसह १२ राज्यांचे चित्ररथ तसेच ७ केंद्रीय मंत्रालयांच्या चित्ररथांनी लक्ष वेधले.
महाराष्ट्राच्या सेनाधिकाऱ्यांचे दमदार नेतृत्व
महाराष्ट्राच्या सेनाधिकाऱ्यांनी विविध युध्द टँकचे नेतृत्व केले. ७५ आर्मर्ड रेजिमेंटचे लेफ्टनंट स्वप्निल गुलाले यांनी भारतीय लष्कराच्या ‘अर्जुन’ या मुख्य युध्द टँकचे नेतृत्व केले. लेफ्टनंट ऋषिकेश सारडा यांनी आयसीव्हीबीएमपी २ टँकचे नेतृत्व केले. भारतीय लष्कराच्या व्हिंटेज सिग्नल यंत्रणेचा महत्वाचा भाग असलेल्या ‘एचटी १६’ या १४ इलेक्ट्रीकल वारफेयर बटालीयन कोर ऑफ सिग्नल यंत्रणेच्या विशेष मॉडेलचे नेतृत्व केले. यावेळी नाशिकच्या आर्टीलरी सेंटरमधील ७५/२४ पॅक होमटर्ज मार्क १ विशेष गनचेही पथसंचलन झाले.
महाराष्ट्राच्या ‘जैवविविधता मानके’ चित्ररथाने जिंकली मने
अथांग सागर, रम्य किनारे। सह्याद्रीचे उंचकडे॥ गवत फुलांच्या रंगांवरती महाराष्ट्राचा जीव जडे॥ जपतो आम्ही जैव वारसा, जपतो आम्ही वसुंधरा, झाडे लावू झाडे जगवू हाच आमुचा धर्म खरा॥’ या शब्दांचा प्रसिध्द पार्श्वगायक सुदेश भोसले यांच्या आवाजातील अर्थपूर्ण रचनेसह राजपथावर महाराष्ट्राचा चित्ररथ दाखल झाला. महाराष्ट्राचा हा चित्ररथ पाहून राजपथावर उपस्थितांनी राज्याचा समृध्द जैवविविधता वारसाच अनुभवला. देशव्यापी ‘वंदे भारतम्’ नृत्य स्पर्धेद्वारे निवडलेल्या ४८० नर्तकांनी यावेळी सांस्कृतिक कार्यक्रम सादर केला. महाराष्ट्रातील कलाकारांचाही यात समावेश होता. दृश्य कला पद्धतीचा वापर करून ‘कला कुंभ’ हा स्वातंत्र्य लढ्यातील दुर्लक्षित नायकांच्या नावांची यादी असलेल्या प्रत्येकी ७५ मीटर लांबीच्या १० लेखपटांचे प्रदर्शनही यावेळी करण्यात आले.
