मुंबई :
महाराष्ट्र विधानमंडळाचे २०२२ चे पहिले अर्थसंकल्पीय अधिवेशन मुंबईत ३ ते २५ मार्चदरम्यान होणार आहे. २०२२-२३ या वर्षाचा अर्थसंकल्प ११ मार्चला सादर करण्यात येणार आहे. विधिमंडळ कामकाज सल्लागार समितीच्या बैठकीत याबाबत निर्णय घेण्यात आला आहे.
विधानपरिषदेचे सभापती रामराजे नाईक-निंबाळकर, विधानसभा उपाध्यक्ष नरहरी झिरवळ, ऑनलाईनच्या माध्यमातून मुख्यमंत्री उद्धव ठाकरे तर उपमुख्यमंत्री अजित पवार, उपसभापती डॉ. नीलम गोर्‍हे, विधानपरिषदेचे विरोधीपक्षनेते प्रवीण दरेकर, विधानसभा विरोधी पक्षनेते देवेंद्र फडणवीस, संसदीय कार्यमंत्री अ‍ॅड. अनिल परब, नगरविकास मंत्री एकनाथ शिंदे, महसूल मंत्री बाळासाहेब थोरात, गृहमंत्री दिलीप वळसे-पाटील, संसदीय कार्य राज्यमंत्री संजय बनसोडे, इतर मागास बहुजन कल्याण विभाग मंत्री विजय वडेट्टीवार, वित्त विभागाचे प्रधान सचिव नितीन गद्रे, विधानपरिषद आणि विधानसभा कामकाज सल्लागार समितीचे सदस्य, विधानमंडळाचे सचिव राजेंद्र भागवत हे विधिमंडळ कामकाज सल्लागार समितीच्या बैठकीला उपस्थित होते.
अधिवेशनाच्या सुरुवातीला कोविडच्या पार्श्वभूमीवर नियमांचे पालन करुन सर्वांनी आरटीपीसीआर चाचणी करणे बंधकारक असणार आहे. तसेच कोरोना प्रतिबंधक लसीच्या दोन्ही मात्रा घेतल्याचे प्रमाणपत्र आवश्यक असल्याचेही यावेळी सांगण्यात आले.
