मुंबई :
वरिष्ठ व निवडश्रेणी प्रशिक्षणाच्या नावाखाली राज्यातील शिक्षकांकडून शुल्क घेऊन तीन महिने उलटले तरीही सरकारकडून कोणत्याही प्रशिक्षणाचे आयोजन करण्यात आले नाही. त्यामुळे सरकारकडून शिक्षकांची फसवणूक होत असल्याचा आरोप भाजप शिक्षक आघाडीचे प्रदेश सहसंयोजक अनिल बोरनारे यांनी केला आहे. तसेच तातडीने प्रशिक्षणाचे आयोजन न केल्यास आंदोलन करण्याचा इशाराही बोरनारे यांनी शिक्षण विभागाला दिला आहे.
राज्यातील वरीष्ठ व निवड श्रेणी पात्र शिक्षकांची २३ डिसेंबरपर्यंत सशुल्क नोंदणी झाली. नोंदणी करून तीन महिले झाले तरी प्रशिक्षण सूरू करण्याच्या कोणत्याही हालचाली दिसत नाही. वरिष्ठ व निवड श्रेणीस पात्र शिक्षकांच्या प्रशिक्षणासाठी शिक्षण संचालनालयाच्या २२ नोव्हेंबर २०२१ च्या परिपत्रकान्वये महाराष्ट्रातील हजारो पात्र शिक्षकांनी ऑनलाईन नोंदणी करण्यात आलेली होती. प्रशिक्षणासाठी इतिहासात पहिल्यांदाच शिक्षण विभागामार्फत वरिष्ठ व निवड श्रेणीच्या प्रशिक्षणासाठी शिक्षकांकडून दोन हजार रुपये प्रशिक्षण शुल्क घेण्यात आले, ही बाब महाराष्ट्राच्या शैक्षणिक संस्कृतीला अशोभनीय असल्याचा आरोप अनिल बोरनारे यांनी केला. महाराष्ट्रातील पात्र शिक्षकांची वरिष्ठ व निवड श्रेणीच्या प्रशिक्षणासाठी सशुल्क नोंदणी झालेली असताना अद्यापही प्रशिक्षणाचा अधिकृत कार्यक्रम तारखांसह निश्चित करण्यात आलेला नाही. शुल्क भरूनही प्रशिक्षणास अतिशय विलंब होणे ही बाब शिक्षण विभागाच्या कार्यशैलीवर संशय निर्माण करणारी आहे. वरिष्ठ व निवड श्रेणी प्रशिक्षणाच्या तारखा घोषित करून प्रत्यक्ष प्रशिक्षणाची सुरुवात करावी अन्यथा नाईलाजास्तव भाजप शिक्षक आघाडीतर्फे राज्यभर आंदोलन करण्यात येईल असा इशारा अनिल बोरनारे यांनी शासनाला दिला.
