- मुंबई
यंदाच्या गणेशोत्सवाचं औचित्य साधत गणेशभक्तांची आवड लक्षात घेत ’गणपती अंगणात नाचतो…’ हे सुमधूर गीत रिलीज करण्यात आलेआहे. या गाण्याच्या व्हिडीओमध्ये गणरायाची भव्य मूर्ती पहायला मिळते. संचित चौधरी आणि शीतल अहिरराव या नव्या कोर्‍या जोडीवर हे गाणं चित्रीत करण्यात आले आहे. या गाण्याच्या निमित्ताने प्रथमच एकत्र आलेल्या शीतल-संचितच्या नृत्याची जुगलबंदी गाण्यात आहे. गुलालाची उधळण, गणरायाचा जयघोष, ढोल, ताशे, लेझीम, पखवाज, तुतार्‍यांच्या निनादात श्रीगणेशाचे आगमन आणि त्यानंतर प्रगटणारे भक्तांच्या मनातील भाव या गाण्यात व्यक्त करण्यात आले आहेत. गणेशभक्तीत तल्लीन होऊन भक्त जेव्हा नाचतात, तेव्हा गणपतीही त्यांच्या तालावर नृत्य करतो अशी सुरेख भावना या गाण्याद्वारे सादर करण्यात आली आहे. गोरक्षनाथ वाघमारे यांनी ’गणपती अंगणात नाचतो…’ हे गाणं लिहिलं असून, व्हिडीओचं दिग्दर्शन राज सहाणे यांनी केले आहे. संगीतकार पी. शंकरम यांनी राधा खुडेसोबत स्वत: हे गीत गायलं आहे. कोरिओग्राफर दिलीप मिस्त्री यांनी या गाण्यावर सुरेख नृत्य दिग्दर्शन केले आहे. समीर दीक्षित आणि हृषिकेश भिरंगी यांच्या पिकल म्युझिकची प्रस्तुती असलेल्या या गाण्याची निर्मिती राखी सुरेश गावडा यांच्या एस. आर. एन्टरटेन्मेंटच्या बॅनरखाली करण्यात आली आहे.
‘गणपती अंगणात नाचतो…’ या अल्बमच्या निमित्ताने गणरायाची ऑनस्क्रीन भक्ती करण्याची संधी मिळाली. गणपती हे सर्वांचंच आराध्य दैवत आहे, पण गणेशोत्सव हा गणरायांच्या भक्तांच्या आनंदाला उधाण आणणारा सण आहे. नावाप्रमाणे विघ्नहर्ता असलेल्या या देवाची आपणही भक्त असल्याचे शीतल म्हणाली.
दीड वर्षांहून अधिक काळापासून सुरू असलेल्या कोरोनाच्या भीतीदायक वातावरणात श्रीगणेशानेच आपल्याला तारल्याचे सांगत संचितने आपल्या भावना व्यक्त केल्या. या गाण्याच्या माध्यमातून गणपतीची सेवा करण्याची एक वेगळी संधी मिळाल्याचे समाधान आहे. हे गाणं पाहिल्यावर प्रेक्षकांनाही नक्कीच समाधान लाभेल यात शंका नाही, असे संचित म्हणाला.
