मुंबई :
कोरोना काळात डॉक्टरांबरोबरीने परिचारिका यांनी अतुलनीय कामगिरी बजावल्यामुळे नागरिकांना दिलासा मिळाला. अशा परिचारिकांना सर्व स्तरावर न्याय मिळवून देण्यासाठी समाजाने पुढाकार घेणे आवश्यक आहे, असे प्रतिपादन आरटीआय कार्यकर्ते अनिल गलगली यांनी केले.
केईएम नर्सेस वेलफेयर सोसायटी २०२२ च्या कार्यकारिणीने केईएम परिचारिका इमारत परिसरात वार्षिक स्नेह संमेलनाचे आयोजन केले होते. प्रमुख पाहुणे म्हणून आरटीआय कार्यकर्ते अनिल गलगली यांना निमंत्रित केले होते. परिचारिकांच्या कार्याबद्दल त्यांनी आदर व्यक्त करत भविष्यात त्यांना येणार्या अडचणी या प्रशासनापर्यंत पोहचवून सकारात्मक निराकरण करणार असल्याचे सांगितले. यावेळी रूग्ण मित्र विनोद साडविलकर यांनी केईएमच्या परिचारिकांच्या सहकार्याने गरीब गरजू रुग्णांना मदत होत असल्याबाबत कृतज्ञता व्यक्त केली.
वार्षिक स्नेहसंमेलनास मेट्रन प्रतिमा नाईक, सिस्टर इन्चार्ज मेघना गांगुर्डे, असिस्टंट मेट्रन लता कांबळे, सिस्टर इन्चार्ज रिध्दी राणे, वॉर्ड असिस्टंट रविंद्र वरखडे, सिस्टर ट्यूटर ज्योत्सना जाधव, सिस्टर इन्चार्ज श्वेता परब, निलीमा शिंदे, स्टाफ नर्स श्रुती गमरे, सायली माने, स्नेहा पाटील, प्रज्ञा देसक व सहकारी परिचारिका यांनी विविध कलागुणांचे सादरीकरण उत्तमरित्या केले. मेट्रन प्रतिमा नाईक यांनी अनिल गलगली व विनोद साडविलकर यांचा स्मृतीचिन्ह देऊन सन्मान केला. याप्रसंगी सर्व परिचारिकांनी नृत्य, गाणी अन्य सांस्कृतिक कार्यक्रमाचे सुरेख आयोजन केले.
