मुंबई :
हाफकिन बाया फार्मास्युटिकलने देयक थकवल्याने नुकतेच एका औषध पुरवठादाराने आत्महत्या करण्यासंदर्भातील पत्र सरकारला पाठवले होते. ही बाब ताजी असतानाच आता जे.जे. रुग्णालय आणि सेंट जॉर्ज रुग्णालयाला स्थानिक स्तरावर औषध पुरवठा करणार्‍या औषध पुरवठादाराने दोन आठवड्यात देयके मंजूर करा अन्यथा माझे व माझ्या कुटुंबियाचे काही वाईट झाल्यास त्याला वैद्यकीय शिक्षण व प्रशिक्षण संचालनालयाचे (डीएमईआर) संचालक, जे.जे. रुग्णालयाचे अधिष्ठाता आणि सेंट जॉर्ज रुग्णालयाचे अधीक्षक कारणीभूत असतील असे पत्र त्यांनी डीएमईआरला पाठवले आहे.
डीएमईआरकडून औषध पुरवठा होण्यास विलंब होत असल्यास तसेच काही अडचण असल्यास रुग्णालयांना स्थानिक पातळीवर औषध खरेदीची परवानगी असते. त्यानुसार वर्षातून अनेकदा रुग्णालये स्थानिक पातळीवर लिलावाच्या माध्यमातून किंवा थेट औषधे खरेदी करू शकतात. त्याचप्रमाणे जे.जे. रुग्णालय आणि सेंट जॉर्ज रुग्णालय स्थानिक पातळीवर शीतल मेडिकल स्टोअरकडून औषधे खरेदी केली जातात. यामध्ये सेंट जॉर्ज रुग्णालयाने आतापर्यंत शीतल मेडिकल अ‍ॅण्ड जनरल स्टोअरकडून २०१५ पासून आतापर्यंत ९० लाख ८६ हजार १७१ किमतीची तर, जे.जे. रूग्णालय प्रशासनाने २०१६ पासून ५ लाख ३७ हजार १७७ रुपये किमतीची औषधे खरेदी केली आहेत. दोन्ही रुग्णालयांची मिळून ९६ लाख २३ हजार ३४८ इतकी थकबाकी झाली आहे. यातील काही रक्कम जे.जे. रुग्णालयाकडून २०२० मध्ये देण्यात आली. मात्र उर्वरित सर्व रक्कम अद्यापही शीतल मेडिकल स्टोअरला मिळाली नाही. यासंदर्भात वारंवार पाठपुरावा केल्यानंतर फक्त तोंडीच आश्वासन दिले जात असल्याने शीतल मेडिकल स्टोअरच्या मालक दक्षाबेन लक्ष्मीचंद शहा यांनी मुख्यमंत्री तक्रार कक्षाकडेही तक्रार केली, मात्र त्याचाही काहीही उपयोग झाला नाही. त्यामुळे हताश झालेल्या शहा यांनी अखेर आत्महत्या करण्याचा निर्णय घेतला असून, तसे पत्र डीएमईआरचे सचिव, जे.जे. रुग्णालयाचे अधिष्ठाता व सेंट जॉर्ज रुग्णालयाचे अधिक्षक यांना पाठवले आहे.
मी एक ६० वर्षीय वृद्ध विधवा आहे. माझी देयके रुग्णालय प्रशासनाकडून थकवण्यात आली आहेत. त्यातच सध्या असलेली कोरोनाची परिस्थिती आणि त्यामुळे निर्माण झालेली आर्थिक चणचण यामुळे मानसिक तणावाखाली वावरत आहे. देयके देण्यासाठी रुग्णालया प्रशासनाकडून करण्यात येणारा मानसिक छळ यामुळे मला माझा व्यवसाय सुरू ठेवणे अवघड झालेआहे. त्यामुळे माझ्यासमोर आत्महत्येशिवाय कोणताही प्रर्याय शिल्लक राहिला नाही. पुढील दोन आठवड्यात माझी देयके आणि त्यावर १८ टक्क्याने व्याज अशी सर्व रक्कम मला देण्यात यावी. अनथ्या माझे किंवा माझ्या कुटुंबियांचे काही झाल्यास त्याला डीएमईआर, जे.जे. रुग्णालय व सेंट जॉर्ज रुग्णालय प्रशासन जबाबदार असेल, असे पत्र शीतल मेडिकल स्टोअरच्या मालक दक्षाबेन लक्ष्मीचंद शहा यांनी डीएमईआरच्या सचिवांना पाठवले आहे.
शीतल मेडिकल स्टोअरच नव्हे तर अन्य औषध पुरवठादारांचीही देयके थकीत आहेत. ही थकीय देयके देण्यासाठी आम्ही राज्य सरकारकडे पुरवणी मागणीअंतर्गत पत्रव्यवहार केला आहे. अधिवेशनात पुरवणी मागणी मंजूर झाल्यास पुरवठादारांची थकीत देयके तातडीने देण्यात येतील.
– डॉ. आकाश खोब्रागडे, अधीक्षक, सेंट जॉर्ज रुग्णालय
