मुंबई :
डिजीटल फॉरेन्सिक, केमिकल बायोलॉजी, नॅनोबायोसिस्टम, सस्टेनेबल अग्रीकल्चर, हेल्थ इन्फॉर्मेटिक्स अँड डेटा सायन्स, मटेरिअल फिजिक्स आणि कम्प्युटेशनल मॅथेमॅटिक्स या उद्योन्मुख क्षेत्रातील प्रगत अध्ययन आणि संशोधनाच्या संधीचे दालन आता मुंबई विद्यापीठात खुले होणार आहे. मुंबई विद्यापीठाने अमेरिकेतील प्रतिष्ठित इंडियाना विद्यापीठासोबत शैक्षणिक सामंजस्यासाठी पुढाकार घेतला आहे. मुंबई विद्यापीठाचे कुलगुरू प्रा. रवींद्र कुलकर्णी यांच्यासह शिष्टमंडळांनी इंडियाना विद्यापीठातील चांसलर आणि एक्झीक्युटीव्ह व्हाईस प्रेसिडेंट प्रा. लथा रामचंद यांच्यासह इतर मान्यवरांशी शैक्षणिक सामंजस्यासाठी स्वारस्य दाखविले आहे. प्रा. लथा रामचंद या मुंबई विद्यापीठाच्या अर्थशास्त्र विभागाच्या माजी विद्यार्थी असून प्रतिष्ठित इंडियाना विद्यापीठाचे नेतृत्व करीत आहेत.
दोन्ही विद्यापीठात झालेल्या शैक्षणिक सामंजस्याच्या अनुषंगाने मुंबई विद्यापीठाने अग्रक्रमाने पदवी आणि पदव्युत्तर स्तरावरील दुहेरी आणि सह पदवीच्या शिक्षणासाठी व उद्योन्मुख क्षेत्रातील संधी आणि गरजा लक्षात घेऊन प्रगत संशोधनासाठी स्वारस्य दाखविले आहे. दुहेरी आणि सह पदवीच्या शिक्षणाला प्रविष्ठ होणाऱ्या विद्यार्थ्यांना तिसऱ्या आणि चौथ्या सत्राचे शिक्षण इंडियाना विद्यापीठात घेता येईल, त्याचबरोबर तेथील विद्यार्थ्यांना मुंबई विद्यापीठात तिसऱ्या आणि चौथ्या सत्राचे शिक्षण घेता येईल. दुहेरी पदवी कार्यक्रमाअंतर्गत विद्यार्थ्यांस दोन्ही विद्यापीठाची पदवी मिळणार असून आंतरराष्ट्रीय मान्यताप्राप्त विद्यापीठांच्या या दुहेरी पदवीमुळे प्रत्येक संस्थेच्या सामर्थ्याचा आणि कौशल्याचा विद्यार्थ्यांच्या शैक्षणिक उत्कृष्टता वृध्दीस हातभार लागणार असल्याचे कुलगुरू प्रा. रवींद्र कुलकर्णी यांनी सांगितले.
स्टडी अब्रॉड प्रोग्राम अंतर्गत विद्यार्थी विनिमयामुळे विद्यार्थ्यांना आंतरराष्ट्रीय वातावरणात उद्योन्मुख क्षेत्रातील विविध संशोधन पद्धती आणि प्रगत उपकरणांचा अभ्यास करता येईल. दोन्ही विद्यापीठातील संशोधकांना संयुक्त आणि सहयोगी प्रकल्पांवर एकत्रित काम करता येईल. त्याचबरोबर संशोधन सहयोगाअंतर्गत दोन्ही विद्यापीठातील पायाभूत व अनुषंगिक सुविधा, कौशल्य आणि आधुनिक उपकरणे आणि संसाधनाच्या एकत्रित वापरामुळे संशोधनातील संभाव्य परिणाम साध्य करता येऊ शकतील. या सहयोगी कार्यक्रमामुळे संशोधन प्रकाशने आणि संयुक्त प्रकाशनावरही काम करण्याची संधी मिळू शकणार असल्याचेही मुंबई विद्यापीठाचे कुलगुरू प्रा. रवींद्र कुलकर्णी यांनी सांगितले. ग्लोबल एज्युकेशन सिटीजनशिप आणि उच्च शिक्षणाच्या आंतरराष्ट्रीयकरणाच्या दृष्टिकोनातून मुंबई विद्यापीठ आणि इंडियाना विद्यापीठ यांच्यातील शैक्षणिक सामंजस्याचे महत्व अधोरेखित होणार आहे. या भेटीदरम्यान मुंबई विद्यापीठाच्या शिष्टमंडळाच्या वतीने इंडियाना विद्यापीठातील प्रगत व अत्याधुनिक प्रयोगशाळाना भेटी देऊन आंतरराष्ट्रीय दर्जाच्या संशोधनाच्या विविध संधीवंरही चर्चा करण्यात आली.
दोन्ही विद्यापीठातील शैक्षणिक सामंजस्याच्यावतीने झालेल्या चर्चेत मुंबई विद्यापीठाच्या वतीने कुलगुरू प्रा. रवींद्र कुलकर्णी आणि राष्ट्रीय आणि आंतरराष्ट्रीय साहचर्य व विद्यार्थी सहाय्य केंद्राचे समन्वयक डॉ. सुनील पाटील आणि इंडियाना विद्यापीठाच्या वतीने चांसलर आणि एक्झीक्युटीव्ह व्हाईस प्रेसिडेंट प्रा. लथा रामचंद, अधिष्ठाता प्रा. जॉन, सहयोगी अधिष्ठाता प्रा. राजीव राजे, इंटिग्रेटेड नॅनोसिस्टमस् डेव्हलपमेंट इन्स्टीट्यूटचे संचालक प्रा. मंगीलाल अगरवाल, संचालक प्रा. डेव्हिड आणि संचालक प्रा. स्टीव्ह उपस्थित होते.
