मुंबई :
शैक्षणिक-औद्योगिक भागीदारी वाढविण्याच्या दिशेने एक महत्त्वपूर्ण पाऊल टाकत, मुंबई विद्यापीठाने युरोफिन्स ॲनालिटिकल सर्व्हिसेस इंडिया प्रा. लिमिटेडसोबत सामंजस्य करार केला आहे. विद्यापीठातील रसायनशास्त्र विभागाने घेतलेल्या या पुढाकारामुळे विभागातील पॉलिमर केमिस्ट्री लॅबचे रूपांतर आणि संशोधन नवकल्पना पुढे नेण्यासाठी या कराराचे महत्व अधोरेखित होणार आहे. या कराराच्या अनुषंगाने विभागातील संशोधन पायाभूत सुविधांमध्ये वाढ करणे, पीएचडी संशोधकांना मार्गदर्शन आणि विद्यार्थ्यांना औद्योगिक क्षेत्रातील प्रात्यक्षिक ज्ञान आणि करिअरच्या संधी प्रदान करण्यासाठीही या कराराचे महत्व अधोरेखित होणार आहे.
नुकतेच मुंबई विद्यापीठ आणि युरोफिन्स ॲनालिटिकल सर्व्हिसेस इंडिया प्रायव्हेट लिमिटेड यांनी सामंजस्य करारावर सह्या केल्या. यावेळी मुंबई विद्यापीठाचे कुलगुरू प्रा. रवींद्र कुलकर्णी, प्र-कुलगुरू प्राचार्य डॉ. अजय भामरे, कुलसचिव डॉ. प्रसाद कारंडे, माजी कुलसचिव प्रा. बळीराम गायकवाड, रसायनशास्त्र विभागाचे प्रमुख प्रा. शिवराम गर्जे, वाणिज्य व व्यवस्थापन विद्याशाखेच्या अधिष्ठाता डॉ. कविता लघाटे, विज्ञान आणि तंत्रज्ञान विद्याशाखेचे सहयोगी अधिष्ठाता डॉ. माधव राजवाडे, पॉलिमर रसायनशास्त्राचे प्राध्यापक प्रा. विश्वनाथ पाटील यांच्यासह युरोफिन्स ॲनालिटिकल सर्व्हिसेस इंडिया प्रायव्हेट लिमिटेडचे व्यवस्थापकीय संचालक डॉ. पंकज जैमिनी, सहाय्यक संचालक डॉ. शिल्पा उतेकर- बाले आणि सहाय्यक व्यवस्थापक प्रशासन राजेश पुजारी उपस्थित होते.
या कराराच्या अनुषंगाने कॉर्पोरेट सोशल रिस्पॉन्सिबिलिटी उपक्रमांतर्गत, युरोफिनने रसायनशास्त्र विभागाच्या पॉलिमर केमिस्ट्री प्रयोगशाळेच्या संपूर्ण नूतनीकरणासाठी भरीव गुंतवणूक केली आहे. त्यामुळे अद्ययावत आणि प्रगत प्रयोगशाळेतील उपकरणांमुळे मोठया प्रमाणात संशोधनाला चालना मिळेल. त्याचबरोबर विद्यार्थ्यांना कार्यांतर्गत प्रशिक्षण आणि करीअरच्या संधीच्या अनुषंगाने काही विद्यार्थ्यांना पूर्णवेळ कर्मचारी म्हणून सामावून घेतले जाणार आहे. रसायनशास्त्र विभागातील प्रा. विश्वनाथ पाटील यांच्या नेतृत्वाखाली पॉलिमर केमिस्ट्री लॅबमध्ये अनेक नाविन्यपूर्ण संशोधन हाती घेण्यात आले आहेत. ज्यामध्ये अदृश्य बारकोडचा विकास, लिथियम आयन बॅटरिंचे पुनर्वापर आणि सुपरकॅपॅसिटरमधील एडव्हान्समेंट यांचा समावेश आहे. त्यांच्या या नाविन्यपूर्ण संशोधनामुळे युरोफिन्सने मुंबई विद्यापीठासोबत भागीदारी करण्यात स्वारस्य दाखवले.
शैक्षणिक-औद्योगिक भागीदारी वाढविण्याच्या दिशेने मुंबई विद्यापीठाने हे मोठे पाऊल टाकले असून नजीकच्या काळात मुंबई विद्यापीठ आणि आघाडीच्या कॉर्पोरेट संस्था यांच्यातील सहकार्याचे अनेक संधीचे दालन यामुळे खुले होणार असल्याचे मुंबई विद्यापीठाचे कुलगुरू प्रा. रवींद्र कुलकर्णी यांनी सांगितले. तसेच या भागीदारीमुळे विद्यापीठाची संशोधन प्रोफाइल उंचावणार असून अनेक उद्योग समुहांना विद्यापीठासोबत सहयोगासाठी आमंत्रित केले जाणार असणार असल्याचेही त्यांनी यावेळी सांगितले. या सामंजस्य करारामुळे विभागातील संशोधन सुविधा आणि अद्ययावत प्रयोगशाळेमुळे विभागात मोठ्या प्रमाणात संशोधनाला चालना मिळणार असल्याचे विभाग प्रमुख प्रा. शिवराम गर्जे यांनी सांगितले.
