सांगली :
यजमान सांगलीसह पिंपरी-चिंचवड, पुणे ग्रामीण, मुंबई शहर पूर्व आणि पश्र्चिम, सोलापूर, अहमदनगर, उपनगर पूर्व, रायगड यांनी “५१व्या कुमारी गट राज्य अजिंक्यपद निवड चाचणी कबड्डी स्पर्धेत” विजयी सलामी दिली. महाराष्ट्र राज्य कबड्डी असो. च्या मान्यतेने सांगली जिल्हा कबड्डी असो.ने युवक मराठा मंडळाच्या सहकार्याने राज्य कबड्डी संघटनेचे उपाध्यक्ष, माजी आमदार दिनकर(तात्या) पाटील यांच्या वाढदिवसानिमित्त या सामन्याचे आयोजन केले आहे. भारताचे माजी पंतप्रधान डॉ. मनमोहनसिंग यांना दोन मिनिटे स्तब्ध उभे राहून श्रद्धांजली अर्पण करून स्पर्धेला प्रारंभ करण्यात आला. सांगली, सांगलीवाडी येथील चिंचबाग मैदानावर झालेल्या फ गटातील सामन्यात यजमान सांगलीने बीडचा ८२-११ असा धुव्वा उडवीत पहिल्या साखळी विजयाची नोंद केली. पूर्वार्धात २लोण देत ३५-०६ अशी आघाडी घेणाऱ्या सांगलीने उत्तरार्धात धुव्वादार खेळ करीत आणखी ४ लोण देत गुणांचे पाऊण शतक पार केले. श्रावणी भोसले, प्रीती जाधव यांच्या तुफानी चढाया त्यांना स्नेहा मासीची मिळालेली पकडीची भक्कम साथ यामुळे हा मोठा विजय शक्य झाला.
गतविजेत्या पिंपरी-चिंचवडने अ गटात पालघरला ४०-३०असे नमविले. विश्रांतीला २०-१२ अशी आघाडी घेणाऱ्या पिंपरी-चिंचवडने नंतरही त्याच जोमाने खेळत विजय साकारला. वृषाली रोकडे, रुपाली डोंगरे पिंपरी-चिंचवड कडून, तर संजना भोईर पालघर कडून उत्कृष्ट खेळल्या. पुणे ग्रामीणने ब गटात पुणे शहरचा कडवा प्रतिकार ३५-३२ असा मोडून काढत पहिला विजय नोंदविला. पहिल्या डावात १२-१७ अशा पिछाडीवर पडलेल्या पुणे ग्रामीणने ही किमया केली. साक्षी रावडे, वैभवी जाधव यांच्या धूर्त खेळीला याचे श्रेय जाते. पुणे शहराच्या अंकिता पिसाळ ने शर्थीचे लढत दिली. मुंबई उपनगर पूर्वने क गटात जळगावला ५४-३० असे रोखले. आक्रमक सुरुवात करीत उपनगरने मध्यांतरापर्यंत २ लोण देत ३५-१३ अशी मोठी आघाडी घेतली. नंतर सावध खेळ करीत आहे ती आघाडी टीकविण्यावर भर देत विजय साकारला. समृद्धी मोहिते, सेजल पेडामकर, मधुरा सावंत यांच्या चतुरस्त्र खेळामुळे उपनगरने हे साध्य केले. जळगांवची कोमल महाजन चमकली. मुंबई शहर पश्र्चिमने इ गटात रत्नागिरीचे कडवे आव्हान ३४-३३ असे परतवून लावत पहिला साखळी विजय प्राप्त केला. पहिल्या डावात ११-१७ अशा पिछाडीवर पडलेल्या मुंबईने सामन्याच्या शेवटच्या क्षणाला गुण घेत ही किमया केली. समृद्धी भगत, ऊर्जा साळगावकर यांच्या संयमपूर्ण खेळाला याचे श्रेय जाते. रत्नागिरीच्या सारा शिंदे, गौरी जाधव यांचा उत्तरार्धात प्रभाव पडला नाही.
मुंबई शहर पूर्वने फ गटात उस्मानाबादचा ६३-२५ असा पराभव केला. पूर्वार्धात २ लोण देत ३२-१७ अशी आघाडी घेणाऱ्या मुंबईने उत्तरार्धात आणखी ३लोण देत हा मोठा विजय साकारला. अदिती काविलकर, कादंबरी पेडणेकर, सई शिंदे यांच्या झंझावाती खेळाने मुंबईने हा मोठा विजय साकारला. उस्मानाबादच्या अपेक्षा मावळे, निकिता जावळे बऱ्या खेळल्या. परभणीने इ गटात नांदेडला ८०-२० असे धुवून काढले. पूर्ण डावात ७ लोणची नोंद करीत परभणीने गुणांचे पाऊण शतक पार केले. वैष्णवी घोणे, गौरी दाहे, गायत्री अवचार यांच्या तुफानी खेळामुळे हा मोठा विजय साकारला. नांदेडची प्राची लोहार बरी खेळली. नंदुरबारने इ गटात मुंबई उपनगर पश्र्चिमला ४०-२८ असे पराभूत करीत कबड्डी रसिकांना आश्चर्याचा धक्का दिला. पहिल्या डावात सावध खेळ करीत १७-१४ अशी आघाडी घेणाऱ्या नंदुरबार ने उत्तरार्धात जोषपूर्ण खेळ करीत १२ गुणांच्या फरकाने सामना खिशात टाकला. समीक्षा पाटील, ज्योती शिंदे यांच्या अष्टपैलू खेळामुळे नंदुरबारने उपनगरला चकविले. प्रतिक्षा सर्वसने, धनश्री कोकरे उपनगर कडून उत्तम खेळल्या.
इतर निकाल संक्षिप्त :
१) सोलापूर वि. वि. औरंगाबाद – (५५-३६)
२) जालना वि. वि. ठाणे ग्रामिण (४७-१७)
३) रायगड वि. वि. लातूर (५५-२०)
४) अहमदनगर वि. वि. सातारा (३८-१९)
५) नाशिक ग्रामीण वि. वि.कोल्हापूर (३१-२४)
६) ठाणे शहर वि. वि. सिंधुदुर्ग (५०-१४)
७) धुळे वि. वि. हिंगोली (४९-२५)
८) पुणे शहर वि. वि. औरंगाबाद (६७-२६)
९) मुंबई उपनगर पूर्व वि. वि. ठाणे ग्रामीण (२१-१८)
१०) पुणे ग्रामीण वि. वि. सोलापूर (५१-२४)
