नवी दिल्ली :
खो-खो विश्वचषक २०२५ च्या दुसऱ्या दिवसाच्या शेवटी, टीम इंडियाने ब्राझीलवर ६४-३४ अशा प्रभावी विजयासह नॉकआउट फेरीकडे वाटचाल केली. इंदिरा गांधी इनडोअर स्टेडियममध्ये झालेला हा सामना रोमांचक क्षणांनी भरलेला होता. भारत आणि ब्राझील दोन्ही संघांनी आपल्या कौशल्याचा अप्रतिम खेळ केला, मात्र भारताने शेवटच्या टप्प्यात आपल्या सामर्थ्याचा ठसा उमटवला.
ब्राझीलची सुरुवात, भारताचा प्रत्युत्तर
ब्राझीलने पहिल्या टर्नमध्ये आक्रमक सुरुवात करत १६ गुण मिळवले. मात्र, भारताने ड्रीम रन दरम्यान दोन महत्त्वाचे गुण मिळवत ब्राझीलवर दबाव निर्माण केला आणि सामन्याचा पाया मजबूत केला. दुसऱ्या टर्नमध्ये भारतीय संघाने आक्रमणात आघाडी घेतली. रोकेसन सिंग, पबानी साबर, आणि आदित्य गणपुले यांनी जबरदस्त खेळ करत भारतासाठी ३६ गुण मिळवले. यामुळे भारताने मोठी आघाडी घेतली.
ब्राझीलचा झंझावात आणि भारताची प्रतिक्रिया
तिसऱ्या टर्नमध्ये ब्राझीलने जोरदार पुनरागमन केले. मॉरो पिंटो, जोएल रॉड्रिग्स, आणि मॅथ्यूस कोस्टा यांनी संघासाठी महत्त्वपूर्ण योगदान दिले, विशेषतः कोस्टाने सहा टचपॉइंट मिळवले. ब्राझीलने या टप्प्यात ३४ गुण मिळवत सामन्यात रंगत निर्माण केली.
भारताची निर्णायक कामगिरी
चौथ्या टर्नमध्ये भारतीय संघाने जबरदस्त पुनरागमन केले. आदित्य गणपुले आणि कर्णधार प्रतीक वाईकर यांनी संघासाठी जोरदार कामगिरी करत विजय टप्प्यात आणला. रोकेसन सिंगने स्काय डाइव्समधून चार गुण मिळवले, तर मिहुलने दोन टचपॉइंट मिळवत भारताचा विजय सुनिश्चित केला. सामन्याचा शेवट ६४-३४ असा झाला आणि भारताने बाद फेरीसाठी आपली दावेदारी मजबूत केली.
सामन्याचे पुरस्कार
- सर्वोत्कृष्ट अटॅकर: पबानी साबर (टीम इंडिया)
- सर्वोत्कृष्ट डिफेंडर: मॅथ्यूस कोस्टा (टीम ब्राझील)
- सर्वोत्कृष्ट खेळाडू: प्रतीक वाईकर (टीम इंडिया)
