मुंबई :
रोटरी क्लब ऑफ पार्लेश्वर मुंबई आणि छत्रपती शिवाजी महाराज स्मारक समिती जुहू यांच्या सहयोगाने आयोजित केलेल्या उत्कर्ष स्मॉल फायनान्स बँक पुरस्कृत ५ व्या राज्य मानांकन कॅरम स्पर्धेत अनुक्रमे प्रशांत मोरे आणि काजल कुमारीने बाजी मारली. पुरुष एकेरीच्या अंतिम सामन्यात मुंबईच्या पंकज पवारने दोन वेळा विश्व चषकावर नाव कोरलेल्या व तीन वेळा राष्ट्रीय विजेतेपद पटकावणाऱ्या मुंबईच्या प्रशांत मोरेविरुद्ध पहिला सेट १६-२५ असा गमावला होता.
दुसऱ्या सेटमध्ये पाचव्या बोर्डनंतर ११-१२ अशी १ गुणांची पिछाडी असताना सातव्या बोर्डात व्हाईट स्लॅमची नोंद करत पंकजने ११ गुणांची कमाई केली आणि आघाडी घेतली. हा सेट पंकज २५-१४ असा जिंकून सामन्यात रंगत आणली. तिसऱ्या आणि शेवटच्या सेटमध्ये पुन्हा एकदा सहाव्या बोर्डानंतर पंकज १६-२० असा ४ गुणांनी पिछाडीवर होता. मात्र त्याने सातव्या बोर्डात १० गुणांची कमाई करत हा सेट २५-२० असा जिंकून आपल्या २५ व्या विजयावर शिक्का मोर्तब केले. तत्पूर्वी अंतिम फेरीत प्रवेश करताना पंकजने पुण्याच्या अभिजित त्रिपनकरला २०-१९, १७-४ असे तर प्रशांतने मुंबईच्या सिद्धांत वाडवलकरला २५-२२, १४-२२ व २२-१२ असे हरवले होते.
महिला एकेरीच्या अंतिम सामन्यात मुंबईच्या काजल कुमारीने रत्नागिरीच्या आकांक्षा कदमला ६ -२३, २४-६ व २१-१६ असे हरवून विजय नोंदविला. तिसऱ्या सेटमध्ये सातव्या बोर्ड नंतर काजलकडे केवळ ३ गुणांची आघाडी होती. परंतु ब्रेकचा फायदा घेत अनुभवी काजलने शेवटचा बोर्ड दोनचा मिळविला आणि निसटता विजय प्राप्त केला.
अंतिम फेरीत प्रवेश करणाऱ्या काजलने मुंबई उपनगरच्या प्राजक्ता नारायणकरला २५-१९, २२-१८ असे तर काजलने ठाण्याच्या समृद्धी घाडिगावकरवर २४-५, १६-१९ व २५-४ असा विजय मिळवला होता. पुरुषांच्या तिसऱ्या क्रमांकासाठी झालेल्या लढतीत सिद्धांत वाडवलकरने अभिजित त्रिपनकरला १०-२४, १६-१५ व २५-१९ असे तर महिलांच्या तिसऱ्या क्रमांकासाठीच्या लढतीत समृद्धी घाडिगावकरने प्राजक्ता नारायणकरला २५-१४, २२-२१ असे पराभूत केले.
विजेत्यांना रोटरी क्लब ३१४१ शाखेचे डिस्ट्रिक्ट गव्हर्नर डॉ. मनिष मोटवानी व सचिव भालचंद्र बर्वे, उत्कर्ष स्मॉल फायनान्स बँकेचे डायरेक्टर नागेश पिंगे, प्रबोधनकार ठाकरे क्रीडा संकुलाचे विश्वस्थ मकरंद येडुलकर, रोटरी क्लब पार्लेश्वर मुंबईचे अध्यक्ष अविनाश मिश्रा, महाराष्ट्र कॅरम असोसिएशनचे मानद सचिव अरुण केदार, मुंबई उपनगर जिल्हा कॅरम संघटनेचे कार्याध्यक्ष संतोष चव्हाण आदी मान्यवरांच्या हस्ते विजेत्यांना रोख पारितोषिके, चषक व प्राविण्य प्रमाणपत्र देऊन गौरविण्यात आले. महिला व पुरुष विजेत्यांनी रोख रुपये २५ हजारांची कमाई केली.
