मुंबई :
राज्यातील आर्थिक दृष्ट्या गरजूंसाठी मुख्यमंत्री सहायता निधी व धर्मादाय रुग्णालय मदत कक्षाच्या माध्यमातून मोठ्या प्रमाणावर अर्थसहाय्य दिले जाते. मार्च महिन्यात मुख्यमंत्री सहायता निधी कक्षामार्फत तब्बल २५१७ रुग्णांना तब्बल २२ कोटींहून अधिकची मदत करण्यात आली असून सर्वाधिक मदत ही मेंदू विकारांवरील उपचारांसाठी करण्यात आली असल्याची माहिती कक्षप्रमुख रामेश्वर नाईक यांनी दिली आहे.
मेंदू विकारांवरील उपचारांसाठी सर्वाधिक मदत
मुख्यमंत्री सहायता निधी कक्षामार्फत तब्बल २५१७ रुग्णांना तब्बल २२ कोटींहून अधिकची मदत करण्यात आली असून सर्वाधिक मदत ही मेंदू विकारांवरील उपचारांसाठी करण्यात आली. मार्च महिन्यात मेंदू विकारांवरील उपचारांसाठी 471 रुग्णांना मदत करण्यात आली. तसेच कर्क रोगावरील उपचारांसाठी 421 रुग्णांना, हिप रिप्लेसमेंटच्या 306 रुग्णांना, अपघातामधील शस्त्रक्रियेसाठी 247 रुग्णांना, हृदय विकारांवरील उपचारांसाठी 239 रुग्णांना, अपघाता संबंधित 184 रुग्णांना, नी रिप्लेसमेंटच्या 150 रुग्णांना, बाल रोगांवरील उपचारांसाठी 145 रुग्णांना आर्थिक सहाय्य प्रदान करण्यात आले.
रुग्णांसाठी दिलासा – कक्षाचा मदतीचा हात
मुख्यमंत्री देवेंद्र फडणवीस यांच्या मार्गदर्शनाखाली सुरू असलेल्या मुख्यमंत्री सहाय्यता निधी कक्षाच्या माध्यमातून विविध रुग्णालयांमध्ये उपचार घेणाऱ्या रुग्णांना आर्थिक मदत मिळत आहे. आर्थिक संकटात सापडलेल्या रुग्णांसाठी हा मदतीचा हात त्यांचे दुःख हलके करण्याचे कार्य करतो, असे भावनिक उद्गार अनेक लाभार्थी रुग्ण आणि त्यांच्या कुटुंबीयांनी व्यक्त केले.
मागील तीन महिन्यांत ५ हजार रुग्णांना मदतीचा हात
डिसेंबर २०२४ ते फेब्रुवारी २०२५ या तीन महिन्यांत ५ हजार २५० रुग्णांना आर्थिक मदतीचे वितरण मुख्यमंत्री वैद्यकीय सहाय्यता निधीच्या माध्यमातून करण्यात आले. यामध्ये डिसेंबर २०२४ मध्ये १३९२ रुग्णांना १२ कोटी २१ लाख रुपये, जानेवारी २०२५ मध्ये १७८८ रुग्णांना १५ कोटी ८१ लाख २७ हजार रुपये, तर, फेब्रुवारी २०२५ मध्ये २०७३ रुग्णांना १८ कोटी ३४ लाख ६६ हजार रुपयांची वैद्यकीय आर्थिक मदत देण्यात आली.
गरजूंच्या मदतीसाठी समाजाने पुढाकार घ्यावा
मुख्यमंत्री सहाय्यता निधी कक्षाच्या माध्यमातून अधिकाधिक गरजू रुग्णांपर्यंत सहाय्याची रक्कम पोहोचवली जात आहे. समाजातील दानशुर व्यक्तींनी देखील मुख्यमंत्री सहाय्यता निधी कक्षास सढळ हाताने मदत करावी जेणेकरून मुख्यमंत्री सहायता निधीच्या माध्यमातून अधिकाधिक रुग्णांना आर्थिक मदत करता येईल. राज्यातील गरजू रुग्णांनी आणि त्यांच्या कुटुंबीयांनी या सुविधांचा लाभ घ्यावा. तसेच, या कक्षाद्वारे देण्यात येणाऱ्या मदतीची माहिती गरजूंपर्यंत पोहोचवण्यासाठी समाजातील संवेदनशील घटकांनी पुढाकार घ्यावा, असे आवाहन कक्षप्रमुख रामेश्वर नाईक यांनी केले आहे.
