मुंबई :
राष्ट्रीय शैक्षणिक धोरणाच्या अंमलबजावणीच्या अनुषंगाने मुंबई विद्यापीठाशी संलग्नित महाविद्यालये, स्वायत्त महाविद्यालये, मान्यताप्राप्त शिक्षण संस्था आणि विद्यापीठातील शैक्षणिक विभागामध्ये शैक्षणिक वर्ष २०२५-२०२६ साठी पदवीच्या ३ आणि ४ वर्षीय अभ्यासक्रमांच्या प्रथम वर्षाच्या प्रवेशपूर्व नोंदणीच्या वेळापत्रकानुसार तीन गुणवत्ता याद्या जाहीर करण्यात आल्या आहेत. परंतु ज्या विद्यार्थ्यांनी प्रवेशपूर्व ऑनलाईन नोंदणी केली नाही अश्या विद्यार्थ्यांना प्रवेशासाठी संधी उपलब्ध व्हावी यासाठी मुंबई विद्यापीठातर्फे नवीन वेळापत्रक जाहीर करण्यात आले आहे. यानुसार दिनांक ०६ ते १० जून २०२५ या कालावधीत https://mu.ac.in/admission या लिंकवर प्रवेशपूर्व ऑनलाइन नाव नोंदणी करता येणार आहे. या कालावधीत प्राप्त झालेले प्रवेशपूर्व ऑनलाईन नोंदणीचे अर्ज आणि आधीचे प्राप्त झालेले प्रवेशपूर्व ऑनलाईन नोंदणीचे अर्ज यांची एकत्रित यादी तयार करून गुणवत्ता यादीनुसार प्रवेश प्रक्रिया पूर्ण करावी अश्या अनुषंगाचे परिपत्रक मुंबई विद्यापीठातर्फे निर्गमित करण्यात आले आहे.
पदवीच्या प्रथम वर्षासाठी होणारे सर्व प्रवेश आणि त्यांचे शैक्षणिक उपक्रम हे राष्ट्रीय शैक्षणिक धोरण-२०२० च्या अनुषंगाने महाराष्ट्र शासन, मुंबई विद्यापीठ आणि विद्यापीठ अनुदान आयोग यांनी वेळोवेळी घालून दिलेल्या तरतूदी आणि मार्गदर्शक तत्वानुसार होतील. मुंबई विद्यापीठाशी संलग्नित सर्व महाविद्यालये आणि स्वायत्त महाविद्यालयांनी निर्गमित केलेल्या वेळापत्रकानुसार प्रवेश प्रक्रिया राबवावी. तसेच महाविद्यालयांकडे असलेल्या प्रवेश क्षमतेनुसार, आरक्षणाचे नियम व तरतूद आणि अभ्यासक्रमांच्या पात्रतेनुसार प्रवेश प्रक्रिया राबवावी असे परीक्षा व मूल्यमापन मंडळाच्या संचालिका डॉ. पूजा रौंदळे यांनी सांगितले आहे.
प्रवेशपूर्व ऑनलाईन नोंदणी प्रक्रियेचे नवीन वेळापत्रक
- प्रवेशपूर्व ऑनलाईन नोंदणी प्रक्रिया (विद्यापीठाच्या संकेतस्थळावर) – ०६ ते १० जून २०२५ (दुपारी १.०० वाजेपर्यंत)
- चौथी गुणवत्ता यादी : ११ जून २०२५ ( सकाळी ११ वाजता)
- ऑनलाईन कागदपत्रे पडताळणी आणि शुल्क भरणे ११ ते १३ जून २०२५ (संध्या ४.०० वाजेपर्यंत)
- पाचवी गुणवत्ता यादी – १४ जून २०२५ (दुपारी १२:०० वाजता)
- ऑनलाईन कागदपत्रे पडताळणी आणि शुल्क भरणे –१४ ते १८ जून २०२५ (संध्याकाळी ५.०० वाजेपर्यंत)
