कुर्ला, घाटकोपरला जलद लोकल थांबणार नाही

मुंबई :

मध्य रेल्वेच्या मुंबई विभागामार्फत रविवारी ३ ऑगस्ट रोजी उपनगरीय विभागांवर विविध अभियांत्रिकी व देखभालीची कामे करण्यासाठी मेगाब्लॉक घेण्यात आला आहे. माटुंगा ते मुलुंड दरम्यान अप व डाऊन जलद मार्गावर ११.०५ वाजेपासून ते ३. ४५ वाजेपर्यंत ब्लॉक घेण्यात येईल. तर हार्बर मार्गावर कुर्ला आणि वाशी स्थानकांदरम्यान अप आणि डाऊन हार्बर मार्गावर सकाळी ११.१० वाजेपासून ते दुपारी ४.१० वाजेपर्यंत ब्लॉक घेण्यात आला आहे.

मुख्य मार्गावर ब्लॉक कालावधीत छत्रपती शिवाजी महाराज टर्मिनस मुंबई येथून १०.३६ ते ३.१० वाजेपर्यंत सुटणाऱ्या डाऊन जलद मार्गावरील ट्रेन माटुंगा स्थानकावर डाऊन धीम्या मार्गावर वळवल्या जातील. या लोकल त्यांच्या निर्धारित स्थानकांवर थांबतील आणि १५ मिनिटे उशिराने गंतव्यस्थानी पोहोचतील. ठाणे पलीकडे जाणाऱ्या जलद ट्रेन मुलुंड स्थानकावर डाऊन जलद मार्गावर पुन्हा वळवल्या जातील.

ठाणे येथून सकाळी ११.०३ ते दुपारी ३.३८ पर्यंत सुटणाऱ्या अप जलद मार्गावरील ट्रेन मुलुंड स्थानकावर अप धिम्या मार्गावर वळवल्या जाऊन मुलुंड आणि माटुंगा स्थानकांदरम्यान त्यांच्या निर्धारित स्थानकांवर थांबतील आणि माटुंगा स्थानकावर अप जलद मार्गावर पुन्हा वळवल्या जातील व १५ मिनिटे उशिराने गंतव्यस्थानी पोहोचतील.

हार्बर मार्गावर कुर्ला आणि वाशी स्थानकांदरम्यान ब्लॉक

हार्बर मार्गावर कुर्ला आणि वाशी स्थानकांदरम्यान अप आणि डाऊन हार्बर मार्गावर ११.१० वाजेपासून ते ४.१० वाजेपर्यंत ब्लॉक असेल. छत्रपती शिवाजी महाराज टर्मिनस मुंबई येथून १०.३४ वाजल्यापासून ३.३६ वाजेपर्यंत वाशी/बेलापूर/पनवेलकडे जाणाऱ्या डाऊन हार्बर मार्गावरील ट्रेन रद्द राहतील. तसेच पनवेल/बेलापूर/वाशी येथून १०.१६ वाजल्यापासून ३.४७ वाजेपर्यंत छत्रपती शिवाजी महाराज टर्मिनस मुंबईकडे जाणाऱ्या अप हार्बर मार्गावरील ट्रेन रद्द राहतील.

हेही वाचा : एमएमएस आणि एमसीए अभ्यासक्रमांची ऑनलाइन प्रवेश परीक्षा ३ ऑगस्ट रोजी

ब्लॉक कालावधीत छत्रपती शिवाजी महाराज टर्मिनस मुंबई ते कुर्ला आणि पनवेल ते वाशी मार्गांदरम्यान विशेष उपनगरीय ट्रेन चालविण्यात येतील. ब्लॉक कालावधीत हार्बर मार्गावरील प्रवाशांना १० वाजल्यापासून ६ वाजेपर्यंत ठाणे ते वाशी/नेरुळ स्थानकांदरम्यान प्रवास करण्यास परवानगी देण्यात आली आहे.

पश्चिम रेल्वेवर ब्लॉक

पश्चिम रेल्वे मार्गावर रविवारी चर्चगेट आणि मुंबई सेंट्रल स्थानकादरम्यान सकाळी १०.३५ ते दुपारी ३.३५ पर्यंत अप आणि डाऊन जलद मार्गावर ब्लॉक घेण्यात आला आहे. ब्लॉक दरम्यान चर्चगेट ते मुंबई सेंट्रल दरम्यान सर्व जलद मार्गावरील गाड्या धीम्या मार्गावर चालवल्या जातील. ब्लॉकमुळे, काही अप आणि डाऊन उपनगरीय गाड्या रद्द राहतील. तर काही चर्चगेट गाड्या वांद्रे/दादर येथून शॉर्ट टर्मिनेट/रिव्हर्स केल्या जातील.