मुंबई :
मुंबई विद्यापीठातर्फे आयोजित करण्यात येत असलेल्या पी.एच.डी. प्रवेश पूर्व परीक्षा (पेट) परीक्षेचे प्रवेशअर्ज भरण्यास ६ नोव्हेंबर २०२४ पर्यंत अंतिम मुदतवाढ देण्यात आली आहे. आतापर्यंत ४ हजार ७३ एवढ्या विद्यार्थ्यांनी ऑनलाईन पद्धतीने यशस्वीरित्या अर्ज केले आहेत. चारही विद्याशाखेतील विविध ७७ विषयांसाठी ही परीक्षा १७ नोव्हेंबर २०२४ रोजी ऑनलाइन सेंटर बेस्ड टेस्ट ( सीबीटी) पद्धतीने विविध केंद्रांवर घेतली जाणार आहे.
सकाळी १०.३० ते दुपारी १२.३० या दोन तासाच्या कालावधीत ही परीक्षा त्या-त्या केंद्रावर आयोजित केली जाणार आहे. परीक्षार्थींनी ३० मिनिटांपूर्वी परीक्षा केंद्रांवर उपस्थित राहण्याचे आवाहन परीक्षा व मूल्यमापन मंडळाच्या संचालिका डॉ. पूजा रौंदळे यांनी केले आहे. तसेच इच्छूक सर्व विद्यार्थ्यांनी विहीत कालावधीत निर्धारीत शुल्कासह ऑनलाईन अर्ज करण्याचेही आवाहन त्यांनी केले आहे. या परीक्षेचा तपशील https://uompet2024.formsubmit.in/ या संकेतस्थळावर उपलब्ध करून देण्यात आला आहे.
