ठाणे :
खुशी गिरीची भेदक गोलंदाजी, पूनम राऊत आणि श्वेता कलपथी या सलामीच्या जोडीने केलेल्या नाबाद शतकी भागीदारीमुळे दिलीप वेंगसरकर फाऊंडेशनने एमआयजी क्रिकेट क्लबचा १० फलंदाज राखून दणदणीत पराभव करत डॉ. राजेश मढवी स्पोर्ट्स असोसिएशन आणि दैवेज्ञ क्रिकेट क्लब आयोजित पाचव्या अर्जुन मढवी स्मृती महिलांच्या ४० षटकांच्या एकदिवसीय क्रिकेट स्पर्धेचे विजेतेपद संपादन केले. एमआयजी क्रिकेट क्लबला १३६ धावांवर गुंडाळल्यावर बिनबाद १३७ धावा करत दिलीप वेंगसरकर फाऊंडेशनने अर्जुन मढवी करंडकावर आपल्या नावाची मोहोर उमटवली.
या निर्णायक लढतीत एमआयजी क्रिकेट क्लबच्या फलंदाजांना मोठी धावसंख्या उभारण्यात अपयश आले. महेक मिस्त्री, रिया दोषी, हिर कोठारी आणि मिताली म्हात्रेने छोट्या खेळीमुळे एमआयजी क्रिकेट क्लबला सव्वाशे धावांचा पल्ला पार करता आला. मेहेकने सर्वाधिक २४, मिताली आणि हिरने प्रत्येकी१६, रिया दोशीने १५ धावा केल्या. फलंदाजांना दडपणाखाली ठेवताना खुशी चार बळी मिळवले. अदिती सुर्वे आणि पूनम राऊतने प्रत्येकी दोन फलंदाज बाद केले. त्यानंतर पूनम आणि श्वेताने प्रतिस्पर्धी गोलंदाज निर्विवाद वर्चस्व गाजवत २० व्या षटकातील दुसऱ्या चेंडूवर विजय निश्चित केला. श्वेताने ५५ चेंडूत ७६ धावा करताना ११ चौकार आणि दोन षटकार ठोकले. पूनमने नाबाद ४५ धावा बनवल्या.
संक्षिप्त धावफलक :
एमआयजी क्रिकेट क्लब : ३३.५ षटकात सर्वबाद १३६ ( मेहेक मिस्त्री २४, मिताली म्हात्रे १६, हिर कोठारी १६, रिया दोशी १५, खुशी गिरी ५.५-२८-४, अदिती सुर्वे ८-१-३१-२, पूनम राऊत ८-२३-२) पराभूत विरुद्ध
दिलीप वेंगसरकर फाऊंडेशन : १९.२ षटकात बिनबाद १३७ ( श्वेता कलपथी नाबाद ७६, पूनम राऊत नाबाद ४५.) दिलीप वेंगसरकर फाऊंडेशन १० फलंदाज राखून विजयी.
स्पर्धेतील सर्वोत्तम क्रिकेटपटू
- शतकी खेळी : मिताली म्हात्रे (एमआयजी क्रिकेट क्लब), महेक पोकर (व्हिक्टरी क्रिकेट क्लब)
- सामन्यात ५ बळी : लक्ष्मी सरोज (भारत क्रिकेट क्लब)
- सर्वोत्तम क्षेत्ररक्षक : सिद्धी पवार (दिलीप वेंगसरकर फाऊंडेशन)
- सर्वोत्तम गोलंदाज : खुशी गिरी ( दिलीप वेंगसरकर फाऊंडेशन)
- सर्वोत्तम फलंदाज : पूनम राऊत (दिलीप वेंगसरकर फाऊंडेशन)
- सर्वोत्तम अष्टपैलू : विभागून – माही ठक्कर (पय्याडे क्रिकेट क्लब), क्षमा पाटेकर (राजावाडी क्रिकेट क्लब)
