मुंबई :
ग्लोकोमामुळे अनेकांना अंधत्त्वाचा सामना करावा लागतो. ग्लोकोमाचे निदान व उपचार वेळेत झाल्यास अंधत्व टाळणे शक्य असते. करोनानंतर स्पर्शविरहित उपचाराला प्राधान्य दिले जात आहे. त्यामुळ राज्यातील आयएएस अधिकाऱ्यांच्या पत्नींची संघटना असलेल्या इंडियन ॲडमिनिस्ट्रेटिव्ह सर्व्हिस ऑफिसर्स अँड वाइव्ह्स असोसिएशनने (आयएएसओडब्ल्यूए) जे.जे. रुग्णालयातील नेत्र विभागातील रुग्णांवर स्पर्शविरहित उपचार व्हावेत यासाठी रुग्णालयाला नॉन कॉन्टॅक्ट टोनोमीटर आणि गोनिओस्कोपी ही उपकरणे उपलब्ध करून दिली आहेत. यामुळे आता जे.जे. रुग्णालयात नेत्र रुग्णांवर स्पर्शविरहित उपचार शक्य होणार आहे.
मोतीबिंदू आणि अपवर्तक दोष (रेफ्रॅक्टिव्ह एरर) यानंतर ग्लोकोमामुळे व्यक्तींमध्ये अंधत्व येण्याचे प्रमाण अधिक आहे. भारतामध्ये जवळपास ११ लाख ९० हजार नागरिकांना ग्लोकोमाचा त्रास असून, त्यातील ८ लाख ९० हजार नागरिकांना ग्लोकोमामुळे अंधत्व आले आहे. मुंबईतील जे.जे. रुग्णालयामध्ये दरमहा सुमारे १५० ते २०० ग्लोकोमाचे रुग्ण उपचारासाठी येतात. या रुग्णांची तपासणी व उपचारासाठी रुग्णालयामध्ये आवश्यक उपकरणे उपलब्ध आहेत. मात्र रुग्णांवर स्पर्शविरहित उपचार करणारी उपकरणे उपलब्ध नव्हती. ही बाब लक्षात घेत राज्यातील आयएएस अधिकाऱ्यांच्या पत्नींची संघटना असलेल्या आयएएसओडब्ल्यूएने जे.जे. रुग्णालयातील रुग्णांना अद्ययावत उपचार सुविधा उपलब्ध व्हाव्यात या उद्देशाने नॉन कॉन्टॅक्ट टोनोमीटर आणि गोनिओस्कोपी ही दोन उपकरणे उपलब्ध करून दिली. या उपकरणांचे लोकार्पण राज्याच्या मुख्य सचिव सुजाता सौनिक यांच्या हस्ते करण्यात आले. यावेळी महाराष्ट्र प्राथमिक शिक्षण परिषदेच्या राज्य प्रकल्प संचालक आर. विमला उपस्थित होत्या. नॉन-कॉन्टॅक्ट टोनोमीटर आणि गोनिओलेंस हे ग्लॉकोमाचे त्वरित निदान आणि उपचार करण्यासाठी अतिशय उपयुक्त उपकरणे समजली जातात. या उपकरणांची किंमत जवळपास पाच लाख रुपये इतकी आहे. या उपकरणांमुळे जे.जे. रुग्णालयामध्ये ग्लोकोमाचे निदान करण्यासाठी येणाऱ्या रुग्णांना यापुढे स्पर्शविरहित उपचार उपलब्ध होणार आहेत, अशी माहिती जे.जे रुग्णालयाच्या अधिष्ठाता डॉ. पल्लवी सापळे यांनी दिली.
उपकरणांचा वापर कशासाठी हाेतो
डोळ्यांमधील वाढलेला दाब हे ग्लोकोमाचे महत्त्वाचे कारण आहे. डोळ्यांचा दाब तपासण्यासाठी नॉन कॉन्टॅक्ट टोनोमीटर हे उपकरण महत्त्वपूर्ण डोळ्याला थेट स्पर्श न करता सहजपणे दाब तपासले जाते. या उपकरणामुळे रुग्णाला अधिक आराम मिळतो. तसेच तांत्रिक सहायकावरील अवलंबित्व कमी होते आणि संसर्गाचा धोका टाळता येतो. गोनिओस्कोपी या उपकरणाद्वारे आईरिस आणि कॉर्निया यामधील कोन मोजला जातो. गोनिओलेंस व स्लिट लॅम्प किंवा ऑपरेटिंग मायक्रोस्कोपच्या मदतीने हे परीक्षण केले जाते.
नॉन कॉन्टॅक्ट टोनोमीटर व गोनिओलेंस ही अद्ययावत उपकरणे राज्याच्या मुख्य सचिव सुजाता सौनिक यांच्या माध्यमातून देण्याची ही पहिली वेळ नाही. यापूर्वी त्यांनी करोना कालावधीतही जे. जे. रुग्णालयाला आरटीपीसीआर चाचणी करण्यासाठी यंत्र उपलब्ध करून दिले होते.
– डॉ. पल्लवी सापळे, अधिष्ठाता, जे.जे. रुग्णालय
