मुंबई :
मीरा रोड येथील वोक्हार्ट हॉस्पिटल्सने नवजात शिशूंच्या देखभालीच्या क्षेत्रात ऐतिहासिक यश मिळवत केवळ २३ आठवड्यांच्या गर्भावस्थेत जन्मलेल्या एका नवजात मुलीवर उपचार करत तिला यशस्वीपणे घरी सोडले आहे. भारतात सर्वात कमी गेस्टेशनल वयात आणि सर्वात कमी वजनात जगलेल्या नवजातांपैकी ती एक आहे. तिचं जन्मावेळी वजन केवळ ५३० ग्रॅम होतं. ११२ दिवस नवजात अतिदक्षता विभागात (NICU) उपचार घेतल्यानंतर, नियोजित डिलिव्हरीच्या तारखेलाच १ किलो ६०० ग्राम किलो वजनासह तिला घरी सोडण्यात आलं. ही केस वैद्यकीय जगतातील एक मैलाचा दगड ठरली आहे, कारण २३ आठवड्यांत जन्मलेल्या बाळांचे जगण्याचे प्रमाण आंतरराष्ट्रीय पातळीवरही फारच कमी असते. भारतात सामान्यतः 24 ते 28 आठवड्यांत जन्मलेल्या बाळांना वाचण्याची संधी मिळते, त्यामुळे हा प्रसंग विशेष महत्त्वाचा ठरतो.
मीरा रोडच्या वोक्हार्ट हॉस्पिटल्सच्या स्त्रीरोग तज्ज्ञ ( कन्सल्टंट पीडियाट्रिशन,) नीतू मुंधडा यांनी सांगितले, “ही केस सुरुवातीपासूनच अत्यंत आव्हानात्मक होती. प्रत्येक तास महत्त्वाचा होता. २३ आठवड्यांत जन्मलेली बाळं प्रामुख्याने श्वसनाच्या अडचणींना आणि पूर्णपणे विकसित न झालेल्या अवयवांशी संबंधित समस्यांना सामोरं जातात. मात्र सततची निगराणी, अत्याधुनिक नवजात तंत्रज्ञान आणि वोक्हार्ट हॉस्पिटल्सच्या संपूर्ण टीमच्या अथक प्रयत्नांमुळे आम्ही या बाळाला जीवनाची संधी देऊ शकलो. सुरुवातीच्या टप्प्यात बाळाला श्वसनासाठी विशेष सहाय्य आवश्यक होतं, परंतु नंतर ती स्वखुशीने श्वास घेऊ लागली आणि तिला घरी जाताना कोणत्याही ऑक्सिजन सपोर्टची गरज नव्हती – जे इतक्या अल्पगर्भावस्थेत जन्मलेल्या बाळासाठी असाधारण मानलं जातं. डॉक्टरांनी तिच्या दृष्टी आणि मेंदूच्या विकासावरही सतत लक्ष ठेवलं, विशेषतः रेटिनोपॅथी ऑफ प्रिमॅच्युरिटी (ROP) सारख्या गुंतागुंतीच्या शक्यतांसाठी. सुदैवाने, तिच्यात कोणतीही गंभीर गुंतागुंत आढळली नाही.”
हेही वाचा :ST : एसटीच्या जागेवर राज्यातील सर्वात मोठे भंगार केंद्र
डॉ. नीतू मुंधड़ा पुढे म्हणाल्या, “ही केस केवळ वैद्यकीय प्रगतीचं प्रतीक नाही, तर जीवनाच्या जिद्दीचंही उदाहरण आहे. बाळाचं कोणत्याही मोठ्या न्यूरोलॉजिकल किंवा दृष्टीसंबंधी त्रासांशिवाय निरोगी राहणं हे समर्पित नवजात केअरचं मूर्त रूप आहे. वोक्हार्ट हॉस्पिटलने बाळाच्या पालकांच्या मानसिक ताकदीचं आणि सहकार्याचंही विशेष कौतुक केलं. त्यांच्या सक्रिय सहभागामुळे बाळाच्या पुनर्प्राप्तीला गती मिळाली. डॉ. मुंधड़ा म्हणाल्या, “पालक प्रत्येक टप्प्यावर आमच्यासोबत होते. त्यांचं सहकार्य अमूल्य होतं.” सध्या बाळ घरी आहे आणि स्तनपान करत आहे. तिच्या वाढीवर आणि विकासावर सतत लक्ष ठेवण्यात येणार आहे. वोक्हार्ट हॉस्पिटल्सच्या नवजात तज्ज्ञांची टीम पुढील काही वर्षं तिच्या आरोग्यावर बारकाईने नजर ठेवेल, जेणेकरून ती पूर्णपणे निरोगी आणि विकसित होऊ शकेल. मीरा रोड येथील वोक्हार्ट हॉस्पिटल्स हे यश वेळेआधी जन्म घेणाऱ्या बाळांच्या पालकांना नव्या आशेचा किरण देते आणि हे दर्शवते की भारतातील नवजात काळजी यंत्रणा आता जागतिक दर्जाचे परिणाम देण्यास सक्षम आहे.
