मुंबई :
मुंबई विद्यापीठाच्या दूरस्थ व ऑनलाईन शिक्षण केंद्रामार्फत (सीडीओई) चालविण्यात येत असलेल्या एमएमएस (मास्टर ऑफ मॅनेजमेंट स्टडीज्) आणि एमसीए (मास्टर ऑफ कम्प्युटर एप्लीकेशन) या दोन वर्षीय अभ्यासक्रमांच्या ऑनलाईन प्रवेश परीक्षेसाठी अर्ज सादर करण्यास मुदतवाढ देण्यात आली आहे.
या प्रवेश परीक्षांसाठी विद्यार्थ्यांना आता ३१ जुलै २०२५ पर्यंत https://forms.epravesh.com/MumbaiUniversity/ या संकेतस्थळावर ऑनलाईन पद्धतीने अर्ज सादर करता येतील. सुधारीत तारखांनुसार विद्यार्थ्यांच्या सरावासाठी ०२ ऑगस्ट २०२५ रोजी मॉक टेस्ट आयोजित केली जाणार असून, ०३ ऑगस्ट २०२५ रोजी ऑनलाईन पद्धतीने परीक्षा घेतली जाणार आहे. ऑनलाईन पद्धतीने आयोजित होणाऱ्या या परीक्षेसाठीचा तपशील विद्यार्थ्यांना त्यांच्या लॉगिन/ ईमेलला उपलब्ध करून दिला जाणार आहे. एमएमएस (मास्टर ऑफ मॅनेजमेंट स्टडीज्) आणि एमसीए (मास्टर ऑफ कम्प्युटर एप्लीकेशन) हे दोन्ही अभ्यासक्रम युजीसी आणि एआयसीटी मान्यताप्राप्त आहेत. दोन्ही अभ्यासक्रमांच्या पात्रता, शूल्क, प्रवेश परीक्षेसंबंधातील अधिक तपशील मुंबई विद्यापीठाच्या सीडीओईच्या https://mu.ac.in/distance-open-learning या संकेतस्थळावर उपलब्ध आहे.
हेही वाचा : परळ स्थानकात जलद गाडीच्या थांब्यासाठी रेल्वे प्रशासनाकडे पाठपुरावा करणार – मंत्री मंगल प्रभात लोढा
मुंबई विद्यापीठाच्या सीडीओई मार्फत चालविण्यात येत असलेल्या एमएमएस (मास्टर ऑफ मॅनेजमेंट स्टडीज्) या अभ्यासक्रमासाठी ७२० एवढी प्रवेश क्षमता असून एमसीए (मास्टर ऑफ कम्प्युटर एप्लीकेशन) या अभ्यासक्रमासाठी २००० एवढी प्रवेश क्षमता आहे. २०२१-२२ या शैक्षणिक वर्षांपासून एआयसीटीई व यूजीसीने सीडीओईच्या माध्यमातून मास्टर ऑफ मॅनेजमेंट स्टडीज (एमएमएस) या अभ्यासक्रमासाठी परवानगी दिली असून हा अभ्यासक्रम एमबीए या अभ्यासक्रमाच्या समकक्ष आहे. एचआर, फायनान्स व मार्केटिंग या तीन विषयात एमएमएस हा अभ्यासक्रम करता येतो. एमसीए (मास्टर ऑफ कम्प्युटर एप्लिकेशन) हा दोन वर्षाचा सुधारित अभ्यासक्रम आहे. सुधारीत कालावधीनुसार विद्यार्थ्यांनी वेळेत ऑनलाइन अर्ज सादर करण्याचे आवाहन दूरस्थ व ऑनलाईन शिक्षण केंद्राचे संचालक प्रा. शिवाजी सरगर यांनी केले आहे.
