कांजूर, नाहूर आणि विद्याविहार स्थानकांवर लोकल थांबणार नाही

मुंबई :

रेल्वे रूळ, सिग्नल यंत्रणा, ओव्हरहेड वायर, अभियांत्रिकी व देखभालीच्या कामांसाठी मध्य रेल्वेच्या मुंबई विभागामार्फत २४ ऑगस्ट रोजी उपनगरीय विभागांवर मेगाब्लॉक घेण्यात आला आहे. मुख्य मार्गावर माटुंगा- मुलुंड अप आणि डाउन धीम्या मार्गावर सकाळी ११.०५ वाजेपासून दुपारी ३.५५ वाजेपर्यंत ब्लॉक घेण्यात आला आहे. तर ठाणे आणि वाशी/नेरुळ स्थानकांदरम्यान अप आणि डाऊन ट्रान्स-हार्बर मार्गावर सकाळी ११.१० ते संध्याकाळी ४.१० वाजेपर्यंत ब्लॉक असेल.

मुख्य मार्गावर छत्रपती शिवाजी महाराज टर्मिनस मुंबई येथून सकाळी १०.१४ ते दुपारी ३.३२ पर्यंत सुटणाऱ्या डाउन धीम्या मार्गावरील गाड्या माटुंगा आणि मुलुंड स्थानकांदरम्यान डाउन जलद मार्गावर वळवल्या जातील. या गाड्या शीव, कुर्ला, घाटकोपर, विक्रोळी, भांडुप आणि मुलुंड स्थानकांवर थांबतील. त्यानंतर मुलुंड स्थानकावर डाउन धीम्या मार्गावर पुन्हा वळविण्यात येतील. या गाड्या नियोजित वेळेपेक्षा १५ मिनिटे उशिराने गंतव्यस्थानी पोहोचतील.

ठाणे येथून सकाळी ११.०७ ते दुपारी ३.५१ वाजेपर्यंत सुटणाऱ्या अप धीम्या मार्गावरील गाड्या मुलुंड येथे अप जलद मार्गावर वळवल्या जातील. या गाड्या मुलुंड ते माटुंगा दरम्यान मुलुंड, भांडूप, विक्रोळी, घाटकोपर, कुर्ला आणि शीव स्थानकांवर थांबतील. त्यानंतर माटुंगा येथे पुन्हा अप धीम्या मार्गावर वळवल्या जातील. या गाड्या निर्धारित स्थानकावर नियोजित वेळेपेक्षा सुमारे १५ मिनिटे उशिरा गंतव्यस्थानी पोहोचतील.

हेही वाचा : कोकणवासीयांचा एसटीला उदंड प्रतिसाद; ५१०३ बसेस फुल्ल 

ट्रान्स-हार्बर मार्गावरील सेवा बंद

तसेच ठाणे आणि वाशी-नेरुळ स्थानकांदरम्यान अप आणि डाऊन ट्रान्स-हार्बर मार्गावर सकाळी ११.१० ते संध्याकाळी ४.१० वाजेपर्यंत ब्लॉक असेल. ब्लॉक काळात वाशी/नेरुळ आणि ठाणे स्थानकांदरम्यान अप व डाऊन ट्रान्स-हार्बर मार्गावरील सेवा बंद राहतील. तर ठाणे येथून सकाळी १०.३५ ते दुपारी ६.०७ वाजेपर्यंत सुटणाऱ्या वाशी / नेरुळ / पनवेलकडे जाणाऱ्या डाऊन मार्गावरील सेवा तसेच पनवेल / नेरुळ / वाशी येथून सकाळी १०.२५ ते दुपारी ४.०९ वाजेपर्यंत सुटणाऱ्या ठाण्याकडे जाणाऱ्या अप मार्गावरील गाड्या रद्द राहतील.

पश्चिम रेल्वेवर रात्रकालीन ब्लॉक

रेल्वे रूळ, सिग्नलिंग आणि ओव्हरहेड उपकरणांच्या देखभालीचे काम करण्यासाठी शनिवार मध्यरात्री २३ ऑगस्ट रोजी वसई रोड यार्ड येथे मालगाडीच्या मार्गावर रात्री १२.३० ते पहाटे ४:३० पर्यंत जम्बो ब्लॉक घेण्यात आला आहे. त्यामुळे रविवार २४ ऑगस्ट रोजी पश्चिम रेल्वेच्या उपनगरीय विभागात दिवसभर ब्लॉक राहणार नाही.