![](https://voiceofeastern.com/wp-content/uploads/2024/07/182113-hospital-4-780x470.webp)
मुंबई :
कर्करोग रुग्णांच्या उपचारासाठी वांद्रे येथील प्रस्तावित रुग्णालय उभारण्यासाठी मुंबई महानगरपालिकेने पावले उचलली आहेत. १६५ खाटांच्या या रुग्णालयाच्या उभारणीसाठी कंत्राटदाराची निवड करण्यात आली आहे. तीन वर्षांत उभारण्यात येणाऱ्या या रुग्णालयासाठी २१३ काेटी रुपये खर्च येणार आहे.
परळ आणि खारघर येथील टाटा रुग्णालयामध्ये देशभरातून मोठ्या प्रमाणात रुग्ण उपचारासाठी येत असतात. मुंबई महानगरपालिकेने नायर रुग्णालयात कर्करोगावरील उपचार सुरू केले आहेत. परंतु रुग्णांची वाढती संख्या पाहता ही व्यवस्था फारच अपुरी आहे. कर्करोगाच्या रुग्णांची वाढती संख्या लक्षात घेता वांद्रे येथील भाभा रुग्णालयाच्या जवळील आर. के. पेटकर मार्गावर मुंबई महानगरपालिकेसाठी आरक्षित असलेल्या २ हजार ५२५ वर्ग मीटर भूखंडावर स्वतंत्र कर्करोग रुग्णालय सुरू करण्याचा निर्णय तत्कालिन मुंबई महानगरपालिका आयुक्त इकबाल सिंह चहल यांनी घेतला होता. महानगरपालिकेच्या वास्तुविशारदांनी रुग्णालय उभारण्यासंदर्भातील आराखडा तयार केल्यानंतर बांधकामासाठी निविदा काढण्यात आल्या होत्या. या निविदा प्रक्रियेत कंत्राटदार निश्चित करण्यात आला आहे.
कसे असेल रुग्णालय
कर्करोग रुग्णालयाची इमारत ही दोन तळघरांसह १० मजली उभारण्यात येणार आहे. जवळपास १३ हजार वर्ग मीटर इतके बांधकाम करण्यात येणार आहे. इमारतीच्या एक ते आठ मजल्यांवर कर्करोगासंदर्भातील उपचारांच्या सुविधा असणार आहेत. तसेच नऊ आणि १० व्या मजल्यावर अधिकारी, कर्मचारी आणि डॉक्टरांच्या राहण्याची व्यवस्था असणार आहे.
काय असतील सुविधा
रुग्णालयामध्ये केमोथेरपी, रेडिओथेरपी, अतिदक्षता विभाग, अद्ययावत कर्करोग उपचार सुविधा असणार आहेत. यामध्ये रेडियोथेरेपीसाठी दोन स्वंतत्र कक्ष, १२ बाह्यरुग्ण कक्ष, विविध प्रकारच्या पाच प्रयोगशाळा, मॅमोग्राफी आणि पीईटी-सीटी युनिट्स, सभागृह, रक्तपेढी, विलगीकरण कक्ष, रुग्णांच्या कुटुंबीयांसाठी वसतिगृहाची सुविधाही उपलब्ध होणार आहे.