मुंबई :
राष्ट्रीय शैक्षणिक धोरणाच्या अंमलबजावणीच्या अनुषंगाने मुंबई विद्यापीठाने आघाडी घेत दुहेरी पदवीच्या शिक्षणासाठी पुढाकार घेतला आहे. याअनुषंगाने आता मुंबई विद्यापीठात विद्यार्थ्यांना दुहेरी पदवीचे शिक्षण मिळणार आहे. मुंबई विद्यापीठाने अमेरिकेतील प्रतिष्ठित सेंट लुईस विद्यापीठासोबत शैक्षणिक सामंजस्य करार केला आहे. या शैक्षणिक वर्षापासून माहिती तंत्रज्ञान विभागात एम.एस. इन डेटा एनालॅटिक्स या अभ्यासक्रमासाठी प्रविष्ठ होणाऱ्या विद्यार्थ्यांना प्रथम वर्षाच्या दोन सत्राचे शिक्षण मुंबई विद्यापीठात तर द्वितीय वर्षाच्या दोन सत्राचे शिक्षण सेंट लुईस विद्यापीठात मिळणार आहे. त्याचबरोबर विद्यार्थ्यांना कार्यांतर्गत प्रशिक्षण आणि इंटर्नशिपही करता येणार आहे.
दुहेरी पदवी कार्यक्रमाअंतर्गत विद्यार्थ्यांस दोन्ही विद्यापीठाची पदवी मिळणार आहे. आंतरराष्ट्रीय मान्यताप्राप्त विद्यापीठांच्या या दुहेरी पदवीमुळे प्रत्येक संस्थेच्या सामर्थ्याचा आणि कौशल्याचा विद्यार्थ्यांच्या शैक्षणिक उत्कृष्टता वृध्दीस हातभार लागणार आहे. आज मुंबई विद्यापीठ आणि सेंट लुईस विद्यापीठ यांच्यात युएएस वाणिज्य दुतावास या ठिकाणी या करारावर सह्या करण्यात आल्या. यावेळी मुंबई विद्यापीठाकडून कुलगुरू प्रा. रवींद्र कुलकर्णी, प्र. कुलगुरू प्राचार्य डॉ. अजय भामरे, विज्ञान व तंत्रज्ञान शाखेचे अधिष्ठाता प्रा. शिवराम गर्जे, कुलसचिव प्रा. बळीराम गायकवाड, विद्यार्थी विकास विभागाचे संचालक डॉ. सुनिल पाटील, माहिती व तंत्रज्ञान विभागाच्या विभागप्रमुख श्रीवरमंगई आणि सेंट लुईस विद्यापीठाकडून प्रोव्होस्ट मायकेल लेविस, प्रवेश व्यवस्थापन उपाध्यक्ष रॉबर्ट रेड्डी, सहयोगी डीन ट्रॉय हरग्रोव्ह, वरिष्ठ धोरणात्मक सल्लागार सुंदर कुमारसामी, ग्लोबल ग्रॅड इनिशिएटिव्हच्या संचालिका अनुशिका जैन आणि अनन्या कुमार यांच्या समवेत मुंबईतील यूएस कॉन्सुलेटमधील कमर्शियल कॉन्सुल डेव्हिड पासक्विनी, जनरल सांस्कृतिक आणि शैक्षणिक विभाग प्रमुख सीटा रायटर, सार्वजनिक व्यवहार अधिकारी ब्रेंडा सोया आणि यूएस कमर्शियल सर्व्हिसच्या नोएला माँटेरो या उपस्थित होत्या.
मुंबई विद्यापीठाच्या माहिती आणि तंत्रज्ञान विभाग आणि सेंट लुईस विद्यापीठ या दोन्ही उच्च शिक्षण संस्थामध्ये झालेल्या कराराअंतर्गत विद्यार्थी विनिमयामुळे विद्यार्थ्यांना आंतरराष्ट्रीय वातावरणात माहिती तंत्रज्ञान क्षेत्रातील डेटा एनालॅटिक्स, डिप लर्निंग, एनएलपी, मशिन लर्निंग, डेटा मायनिंग, डेटा एथिक्स अँड प्रायव्हसी, बिग डेटा एनालॅटिक्स आणि डेटाबेस मॅनेजमँट अशा विविध विषयातील अध्ययन, संशोधन पद्धती आणि उपकरणांचा अभ्यास करता येईल. या सहयोगाअंतर्गत दोन्ही विद्यापीठातील पायाभूत व अनुषंगिक सुविधा, कौशल्य आणि आधुनिक उपकरणे आणि संसाधनाच्या एकत्रित वापरामुळे अध्ययन व संशोधनातील संभाव्य परिणाम साध्य करता येऊ शकणार असल्याचे मुंबई विद्यापीठाचे कुलगुरू प्रा. रवींद्र कुलकर्णी यांनी सांगितले.
तसेच एम.एस. इन डेटा एनालिटिक्स या पदव्युत्तर अभ्यासक्रमाची व्याप्ती वाढवून पीएच.डी.साठीही सामायिक कार्यक्रम राबविण्यात येणार असल्याचेही त्यांनी सांगितले. या करारामुळे उच्च शिक्षणाच्या आंतरराष्ट्रीयकरणाच्या दिशेने वाटचाल करताना माहिती तंत्रज्ञानाच्या क्षेत्रात भारत आणि अमेरिकेतील संशोधनाच्या प्राधान्यक्रमामुळे विद्यार्थ्यांना या क्षेत्रातील जागतिक समज विस्तृत करण्यास मदत होईल तसेच विद्यार्थ्यांसाठी संधीचे नवे दालनही खुले होईल.
दुहेरी पदवीचे फायदे
- विद्यार्थ्यांस दोन्ही विद्यापीठाची पदवी मिळवण्याची संधी
- मुंबई विद्यापीठ आणि सेंट लुईस विद्यापीठाकडून मिळणाऱ्या दुहेरी पदवीमुळे विद्यार्थ्यांच्या शैक्षणिक कामगिरीची आंतरराष्ट्रीय ओळख वाढविण्यास मदत
- विद्यार्थ्यांना भारत आणि अमेरिका या दोन्ही देशांतील वैविध्यपूर्ण शैक्षणिक वातावरण, अध्यापन पद्धती आणि संशोधन पद्धतींचा फायदा
- दोन वेगवेगळ्या देशांमध्ये राहणे आणि अभ्यास करण्यामुळे विद्यार्थ्यांना सांस्कृतिक जागरूकता, अनुकूलता आणि भाषा कौशल्ये विकसित करण्यास मदत
- सांस्कृतिक आणि भाषा कौशल्ये वृद्धीस मदत
- दोन्ही संस्थांमधील अत्याधुनिक संशोधन सुविधा आणि प्रयोगशाळांच्या प्रवेशामुळे व्यावहारिक कौशल्ये आणि संशोधन क्षमता वाढीस चालना
